jueves, 24 de marzo de 2011

La Barganiza (Siero) - Monte Cucureza

19 de Marzu de 2011

Track: La Barganiza (Siero) - Monte Cucureza



Afayaivos al primer capítulu de "A la gueta del vértice perdíu", onde caleyaré per conceyos asturianos con menos calter montañeru, pero nos que siempre pue facese dalgo de senderismu y atopar y tachar vértices xeodésicos o másimes cotes del conceyu trabayando en rutes mui pocu trallaes y que de xemes en cuando tórnense más abegoses qu'otres más afamaes.

Por suerte, la mayor de les vegaes, tendré'l placer de tar acompangáu pola mio mocina y futura montañera (prubina nun sabe onde se mete, jaja), que dirá fogueándose nestes rutes hasta poder dir colos alloriaos del GM Xuan de la Borrina.


Primeros pasos dende la Barganiza (269 ms)

Nesti casu, vamos averános a la parroquia sierense de Samartindianes, y más en concretu al pueblu de La Barganiza onde atópase un campu golf, asína que nun ye mui complicáu llegar. Nós, salimos de Llugones (segundu campu bas, depués de Xixón), y tomaremos la SI-2, pasando pola Iría y en Viella, garraremos la As-17, onde al altor d'El Conceyín y Bobes, desviarémonos nuna retonda hacia La Barganiza, onde conduciremos per una carretera hasta'l cruce cola SI-4, la cual tomaremos hacia la manzorga y nos dexará al fin, nel nuesu puntu d'aniciu.

Dexamos el coche nun crucie, pa pasando un pelín les 4 la tarde, ponenos a caleyar per una carretera pel mediu de los campos de golf, así que de xemes en cuando saldrános dalgún paisanín vestíu, enforma ridículu, tirando d'un carru.

Nun-y damos muncha importancia, y siguimos caleyando hasta'l crucie que señala pal pueblu de Vió. Equí, pa facer un pocu de gracia a la ruta, vamos pasar una pequeña portiella, y xubir en direición a unos depósitos d'augua, hasta facer cume nel Picu Vió de 314 ms, onde tendremos una vista guapa del conceyu de Xixón.


Dexando atrás el Picu Vió (314 ms)

Baxamos pel prau, hasta averanos a una viesca ocalito, la cual dexamos a la manzorga, y dempués de travesar delles allambraes, tornaremos a la carretera de nuevu, demientres fixámonos en que nel llau contrariu del monte, hai una especie de campu de xuegu de paintball o dalgo asína.

Siguiremos pela carretera hasta qu'agüeyamos que va pasar pente una viesca. Nel intre, supónse que tendríemos que garrar un camín a la esquierda, p'arrodiala y facer el finxu que teníemos pa güei, que nun ye otru que'l monte Cucureza.

Hasta esti puntu, llevábemos andao unos 35 minutos y tardamos unos 20 más, en danos cuenta que valía más siguir pola carretera p'arrodiar el monte y xubílu dende la otra fastera. La verdá, ye que faíse abegosu, siguir caleyos marcaos nos mapes, cuando cada prau tien allambraes (elléutriques o non) y portielles (ta mui de moda la portiella-somier) que zarren pasos d'usu comunales.


Vértice xeodésicu del monte Cucureza (303 ms)

Finalmente, dempués de saltar valles, allambres, alcontrar una piscina de barru y dar la vuelta hasta la carretera, dimos cola entrada al prau, onde taba'l naguáu vértice xeodésicu de 303 ms. Nun hai muncho más que cuntar, aparte de que taben les vaques perí pastiando, y el paisanu esnucáu escontra una vara yerba. Como nun gurgutó res, ficimos una semeyina col moyón de formigón y salimos cagando centelles, nun fuera qu'aínda llevásemos una camada palos.

Magar de recuperar la carretera meterémonos a la mandrecha per una portiella de madera, xustu enantes del pueblu de Pañeda Vieya, y garraremos al fín, una pista de tierra mui afayaiza pa bici montaña, y podremos pasear con tranquilidá arrodiando dellos regatos que conformen la riega la Barganiza.



Delles semeyes del agradable paséu per pista


Un hora esáuta llevarános el paséu, siempre per pista, con delles baxaes y xubíes, riegues a travesar, ... y que si nun fuera pol estáu ñubáu del día, daríanos unes perguapes vistes tanto a picos al Oriente, como al Aramo y macizu de Penaubina al Sur. Tamién alcontrarémonos con vieyes edificaciones, que supongo servirán a los militares eggpañoles pa práutiques ya que ta cerquino'l cuartel esi de cabo Noval.

Como a mi tampoco me va'l Rock Militar (como a Dixebra) y prefiero pasear al llau de les oveyes que ser una delles, pasamos fino d'esto, y anque pudimos garrar en dalgún momentu la carretera pola que vinimos en coche a la Barganiza, preferimos siguir en circuitu hasta aportar de nueu, a la carretera anterior saliendo xustu entre'l Picu Vió y el monte Cucureza.


Aportando a la Barganiza de nueu

Namái, nos quedaba dar pasu hasta la Barganiza, pa dar por finada esta primer ruta de Paula, na que caleyamos unes 3 hores (fadríase en menos, porque perdímonos delles vegaes colos caleyos zarraos) pa facer dalgo más de 9 kms (foron más de 11 kms coles pérdides) y unos 230 ms desnivel acumuláu.

Nesta ruta ficimos un vértice xeodésicu de Siero: Monte Cucureza (303 ms)

Ver progresos en: Retos montañeros

jueves, 17 de marzo de 2011

Folgueraxú (Cangas del Narcea) - Pena'l Cuervu

5 de Marzu de 2011

Track: Folgueraxú (Cangas del Narcea) - Pena'l Cuervu



Nun siempre salen les coses como tiénense pensaes. Magar de ser cansino enforma preparando les rutes, mirando la meteo,... esta vegada confundime de llenu camentando que la ruta yera cortina y que diba ser prestosu facela entera con ñeve, pero.... nun contaba cola ñevadona que cayera unes poques hores enantes y qu'inda nun colara del too del puertu cangués de L.leitariegos.

Asína que, dempués de dos hores de coche dende Xixón y un desayunín a la salida de Cangas del Narcea, aportamos enriba'l puertu detrás de la quitañeves, y preparámonos pa facer la ruta demientres el termómetru del coche marcaba -2º C. Esto ya daba a pescanciar que diba ser difícil la ruta y más contando qu'esta vegada, veníen con nós, xente que nun taba preparáu pa tala ascensión al Cuetu d'Arbás.


Intentando abrir buelga nel puertu L.leitariegos

El casu ye que ficimos media preba a abrir buelga pel Puertu en direición al Cuetu, pero diba ser mui complicada y dura l'ascensión, hasta pa los que dibemos preparaos pa ello. Asína que, pa dexar a la metá del grupu baxando a tomar vermús en Cangas, dexámoslo toos pa otra ocasión.


Valle d'Arbás

Pero como non, llevaba dalgo más preparáu por si les mosques, colo que pudimos caleyar un pocu y facer fame pa xintar per ehí. Pa ello tuviemos que baxar de nueu en direición a Cangas hasta topanos col pueblu de Bimeda, onde xubiríamos a Folgueraxú, p'ascender hasta la Pena'l Cuervu de 1305 ms.

Poro, p'arribar a esti pueblín saldríemos de Xixón, en direición Uviéu, onde siguimos pola As-63 en direición Grau, hasta'l final onde saldrémonos na salida de Cangas del Narcea y equí tomaremos la As-15, travesando parte de los conceyos de Salas y Tinéu hasta entrar en Cangas del Narcea onde pasaremos polos pueblos de L.lanteiru, Xavita, Portiel.la, Antráu, Tubongu, Vil.lar de Tubongu, Castrusín, San Pedru de Courias, Courias hasta aportar a Cangas del Narcea.

Llueu d'entrar na capital, tomaremos nun cruce la manzorga pa garrar la As-213, pasando polos pueblos de Sienra, L.lumés, Ponticiel.la y Bimeda onde al fín, tomamos a la mandrecha otra carreterina que n'infinites envueltes pasaremos pol pueblu de Bustiel.lu y el de Murias de Pontarás, hasta arribar a Folgueraxú (nunca meyor dicho polo arriba que ta).


Primeros pasos pela pista y el Caniellas presente

Asína pues, dempués d'aparcar como bien se pueda en Folgueraxú, saldremos al fin a usar les pates pa dalgo más que pa pisar pedales nel coche. Ensín más, xubiremos a la parte alta del pueblu, y tomaremos una pista a la esquierda, que sin mayores dificultaes, nos dirá amosando tol val.le d'Arbás cola ñube pegada al Cuetu d'Arbás y al puertu, d'onde nos tuviemos que volver.

En 20 minutinos tamos ya na Vega'l Cepu (1233 ms), onde supónese qu'hai una l.laguna (la de la Barraca), pero nun l'atopamos per nengún lláu, o taba mui bien tapecía pola ñeve. Nós siguimos a lo nuesu, y magar de facer la envuelta en direición al cumal de la Pena'l Cuervu, péganos de nueu esi vientín fríu, faciendo desapaecer la bona sensación térmica soleyera.


Aportamos a la vega'l Cepu y entamamos la xubida final

Poro, como nun hai ganes de pasar fríu, siguimos arista alantre, pasando pola pena Achalgas (nun mos pusimos a restolar a ver si cayía daqué valiosu) y bien ceo, aportamos al cumal y al vértice xeodésicu de la Pena'l Cuervu de 1305 ms.


Cumal de la Pena'l Cuervu (1305 ms)

Tres cuartos d'hora llévanos facer esti cumal, qu'a les clares, alcuérdanos por qué refugamos la intentona al Cuetu d'Arbás, ya que fai un cutu importante, así que toca sacar una semeyuca de grupu ya que nel día de güei, somos los borrinos: Diego, Pilar, Canta, Simón, Javi Rico, Carlos y yo, más el mio hermanu Gus y la mio cuñada, Sonia, más un collaciu más, Dani, que paez ser que tan animándose anguaño a descubrir l'ablucante rialidá d'Asturies, dempués de munchos añinos.


Baxando coloraos como pitinos

D'equí namái queda baxar pela otra fastera'l monte, per onde si pasamos al llau d'un l.laguna mediu xelada, y pocu más alantre de la capiya de Santarbás, fadremos otra envuelta ya en direición al pueblín de Folgueraxú (1100 ms).

Finalmente, llibramos el día "medianamente bien", colos 4,4 kms y 220 ms d'ascensión na hora y 20 minutos que tuviemos caminando, anque a dicir verdá lo meyor del día foron les cañes per Cangas del Narcea a lo postreru, onde había un ambientín bien guapu pa un sábadu pela mañana y dempués la fartura de rigor, con un cachopu como una llábana de grande.

Hai que dicir, que de primeres pa llevar a la xente al monte, hai qu'engañalos con fartures, y llueu ya deprenden a esfrutar de la propia montaña col bocata y el chocolate, jeje.


Camudando'l Camín dende la Pena'l Cuervu

Nesta ruta ficimos un vértice xeodésicu de Cangas del Narcea: Pena'l Cuervu (1305 ms)

Ver progresos en: Retos montañeros

jueves, 10 de marzo de 2011

Puertu Ventana (Teberga) - Penón Amenu - Pena sol Tambarón

20 de Febreru de 2011

Track: Puertu Ventana (Teberga) - Penón Amenu - Pena sol Tambarón



Ya llovió dende la última vegada que fuera dos díes siguíos de monte y más tando mediu lesionáu, pero como nun me fuera na mal el día anterior na Manteiga, había que probar dalgo más "potente" colos nuesos collacios vascos y con más ganes inda si cabe, ya que díbemos conocer la fastera norte del macizu d'Ubina.

Pa ello teníemos qu'averanos al puertu Ventana, llugar de pasu al país vecín Llionés, nel conceyu de Teberga, y como non, pa ello salimos de Xixón, a una hora prudencial ya que la paliza dende Colombres de los nuesos collacios, aconseyaba nun madrugar muncho.

Así que, ponémonos en marcha Pangua y yo sobre les 7 y media la mañana, y tomamos la autovía en direición Uviéu, pa garrar a posteriori la de Grau, saliéndonos al pocu, pa facer tol valle del Trubia, travesando los conceyos de Santu Adrianu, Proaza y nel pueblu de Caranga Baxu, tomar direición a Teberga entrando n'él pol pueblu d'Entragu, hasta parar na capital tebergana de La Plaza, onde fadremos l'almuerzu y l'alcuentru con Fernan, Bea y Josean, que veníen de furgo hasta'l gorru ya.


Semeya de grupu nel Puertu Ventana (1592 ms)

Magar d'estirar les pates y llenar l'estómagu, ponémonos en marcha hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu antes d'atacar la parte final del puertu, el cúal taba pelín delicáu con dalgo de xelu y ñeve nel so asfaltu. A la fin aportamos, y preparámonos pa esfrutar d'una ruta bien alpina y d'un tiempu mui fríu y dalgo inestable, con una amenaza de ñeve, que nun sabemos onde nin cuando nos va pillar.


Partiendo del puertu Ventana y col Penón de Ventana al fondu

Salimos del Puertu Ventana (1592 ms), mirando más pal cielu que pal suelu, y empobinámonos al traviés d'una pista, qu'a pesar de la cantidá de ñeve, albídrase bien, y que nos llevará n'envueltes pela Braña Nueva, pa llueu dexar el Penón de Ventana embaxu y dir ganando altor pegaos a la caída hacia la fastera l.lionesa de Santumil.lanu.


Primeros pasos pela pista hacia las Rebol.losas

Siguimos con un güeyu pegáu al llombu, ya que les ñubes avancen y paez que nos lo van poner difícil, y de pasu echámos-y una güeyada a la Ferreirúa y montes de Somiedu, col envís de achisbar dalgún requexu nel cielu que nos dea la esperanza de nun facer perder el tiempu y el día a los nuesos collacios vascos.

Y ye que solu de pensar na paliza de furgo que se metieren pa nada, tábame encabronando... menos mal, que de xemes en cuando apaecía'l macizu d'Ubina con dellos picos como'l Prau y los Picos del Fontán, asína como l'arista sur d'Ubina pa llevantar un pocu los ánimos.


Una güeyadina al Prau y Picos del Fontán

Como la situación nun diba a meyor, ya tábemos atalantando como compensar a Fernan, Bea y Josean, y lo meyor yera una fartura de les bones, jeje. Aún así, alcordamos llegar hasta las Rebol.losas y ver si se podía facer dalgo o non. Asína pues, cola ñeve pelín más blanda que pola pista, facemos tola arista hasta aportar a los sos 1931 ms.

Equí enriba, soplaba'l vientu faciendo la sensación térmica menor, poro falamos un pocu que facer, y Bea y Josean, deciden tornar al coche, y nós (Fernan, Pangua y yo), camentamos cuanto podríamos avanzar si al menos baxamos a la veiga Socel.lares onde taremos dalgo más refuxaos del fríu.

Enantes d'ello, intentamos pescanciar cual sería la ruta a siguir, ya que nos míos planes tenía en mente casi facer 5 dosmiles, nesti orde: Sol Tambarón, Amenu, Pena Socel.lares, Güertu'l Diablu y Mel.luque, pero nel intre, yes a agüeyar nidio, cuales son les posibilidaes riales d'una ruta, y ye que con tal cantidá de ñeve y tiempu amenazante había qu'escoyer.


Xubiendo a las Rebol.losas y baxando hacia'l col.láu Socel.lares

Casi hora y media llevábemos dende'l puertu, asína que decidimos atacar al Penón Amenu, por ser el menos lloñe y ver darréu si teniemos oportunidá d'averanos a la pena sol Tambarón, que ta un pelín detrás. A ello, animónos ver una apertura nel cielu, que podria aguantar un par d'hores con suerte.

Pa ello, baxamos los metros de desnivel que nos separtaben del col.lau Socel.lares (1848 ms) y entamamos a bordiar la Pena Mel.luque pela so manzorga. Esta pena que toma'l nome de la Cueva'l Mel.luque, ye una actividá que dexaremos pa otru día, axuntándolo cola Pena Socel.lares (malnomáu Güertu'l Diablu Norte) y col Picu'l Güertu'l Diablu, pero como siempre esto ye otra hestoria, na que taben mediu metíos otru grupu que partió del puertu a la mesma vegada que nós.


Bordiando la Pena Mel.luque y colas Rebol.losas detrás

Nós, siguimos a lo nuesu, ya intentando caltener un altor costante, vamos dir averándonos poquín a pocu pela bas d'estes penes hasta aportar a otru col.láu que pondríamos en disposición de xubir al Penón Amenu pola parte d'atrás y tamien de tirar a pola ascensión del Picu sol Prau la Siel.la de 1991 ms.

Magar de ver cuala yera la meyor opción, decidimos tirar pela cara que teníemos de frente faciendo una travesía en diagonal embaxu de les primeres peñes, pa dempués garrar una pequeña canal, que nos dexara n'arista n'otra envuelta.


Faciendo la buelga hacia'l Penón Amenu

Una cosa ye preparar l'aición a facer y otra ye como sal, ya qu'a la fín, metímonos ceo n'arista por mor de xubir demasiáu y non garrar la canal correuta, y tuviemos que facer un pasu espuestu (un resbarión tontu daba nun tobogán, pel qu'esnidiaríemos hasta'l prau la Siel.la más menos, jeje) nel que yo que diba delantre nun alcontraba agarre de pies y taba encaramáu coles manes a la pena, resbariando continuamente colos pies.

A la fín, saqué'l pasu, pudiendo poner un pie nun furaquín y aupeme a l'arista faciendo'l cumal ya ensín problemes. El casu ye que, Pangua pudo siguime coles indicaciones que-y dí, y Fernan demientres tanto, ya baxara a la gueta de la canal correuta y algamó'l cumal ensín problemes tamien.


Cume del Penón Amenu (2001 ms)

Paez increyible, pero dempués de más de dos hores y media d'incertidume tamos nun cumal preciosu y col día espeyáu, anque vemos a lo lloñe, penriba de Pena Orniz, venir tola ñubona, poro nun tenemos munchu tiempu más pa tar esfrutando de los sos 2001 ms raspiaos y de les sos vistes.


Vistes de Teberga y Fernan cola pena Sol Tambarón detrás

Malpenes un pocu de turrón de chocolate, y ponémonos con xeitu, pa facer la baxada, pola canal bona, ensín esponer nada, y en 15 minutinos tamos nel col.láu ente'l Penón Amenu y la Pena sol Tambarón.


Baxando del Penón Amenu hacia'l col.láu ente l'Amenu y sol Tambarón

Tamos a unos 1918 ms, y tenemos la pena sol Tambarón de frente, ufreciéndonos una ascensión mui nidia y fácil, xubiendo de primeres a un hombru y llueu fadremos tola arista hasta aportar al cumal. Así lo ficimos, pero una vegada que tamos nel hombru, nun podemos facer otra cosa que parar unos minutos.


Nel hombru na pena sol Tambarón y ganando la so arista

Ye dafechu imposible, nun quedar plasmáu, acolumbrando asemeyáu paisaxe ... tenemos embaxo nuesa tol Puertu Agüeria, cola pena Ruea enfrente y col grupu Tapinón-Siegalabá un pocu más a la mandrecha, y per delantre'l Fariñentu un pelín más a la drecha y.... un pocu más inda, apaez ablucante'l Ranchón. Facía tiempu, que nun me dexaba un monte una impresión igual y ye que la so caída sol Puertu Agüeria dexome namoráu,... que pasada...


Guapa arista y cumal de la pena Sol Tambarón (2005 ms)

Pero inda quedábanos ganar l'arista, lo cual faise cenciellu, y d'agasayu va danos, un paseín a altor casi másimu, per tola so estensión, d'una guapura que solo la ñeve pue ufrecer, dándo-y un toque alpinu xenial.

Otra estancia pequeña na cume, coles semeyes de rigor, nos sos 2005 ms, y mirando'l reló... les casi 3 hores de ruta y el propiu día que taba escureciendo, diónos a camentar que la baxada tenía que ser lo más rápida posible. Tamién teníemos en mente, a Bea y Josean, que sabíemos que taríen aburríos na furgo.


Baxando de la pena Sol Tambarón a güevu

Asína pues, desdexamos la opción de tornar pela arista y vamos baxar pela paré, aprovechando que la ñeve fai una pala afayaiza pa baxar direutamente hasta la veiga Socel.lares, na que nos ponemos en venti minutinos, con dalguna metedura de pata hasta'l cadril, pero sin mayores problemes.


Hostia fina, jeje!! y recuperando la dignidá na veiga Socel.lares

El nuesu pasu pela veiga Socel.lares (1736 ms), será tamién bien rápidu, dexando a la nuesa mandrecha'l L.legu Socel.lares, pa tornar a xubir un pelín hasta la col.lá de Cuanas Albas de 1786 ms, que sirve de pasu pente'l cumal del Beiforcu y las Rebol.losas.

Nel intre, teníemos delles alternatives, como xubir a las Rebol.losas y tomar el mesmu camín de vuelta al Puertu Ventana, o bordialas nuna senda penriba los 1800 ms, o notru senderu que rondiaba los 1700 ms, lo cual paecía meyor pa baxar más apriesa, pero.... como non, siempre que confiamos en rutes trazaes penriba un mapa, pasa lo que tien que pasar,....

Y ye qu'hasta la col.lá, llevábemos 3 hores y media de ruta, y contábemos tar en media hora más aprox nel puertu, pero'l senderu resultó ser una trampa de ñeve pela rodiella, nel qu'avanzar conviertose nuna llucha ensin pausa, sobretou na viesca qu'hai pente los Molares y el Cantu los Tuérganos, onde fizo falta más brenga si cabe, con tramos de tirar de tracción 4x4, ye dicir a cuatru pates, jeje.

Al final, nel cantu los Tuérganos, garramos la pista (al fin!!!) que nos empataría cola de xubida p'arribar de nueu al puertu Ventana, dempués de 5 hores de ruta pela ñeve ensín parar casi a descansar y na que ficimos unos 11 kms y unos 730 ms de desnivel aprosimáu.

Pero inda teníemos una delda con Bea y Josean, asína que baxamos a La Plaza y metímonos una fartura en Casa Laureano, onde la xinta taba xenial, probando'l pitu caleya, fabes con amasueles, xabalín, etc... y poniendo'l puntu final a un perbono día de montaña.


Camudando'l Camín dende la Pena Sol Tambarón

Nesta ruta ficimos dos 2miles de Quirós y del Club 58: Pena sol Tambarón (2005 ms) y Penón Amenu (2001 ms)

Ver progresos en: Retos montañeros

jueves, 3 de marzo de 2011

Valbona (Miranda) - Xerra Manteiga

19 de Febreru de 2011

Track: Valbona (Miranda) - Xerra Manteiga



Espantada típica del GM Xuan de la Borrina, na que quedámonos solos pa facer una ruta l'interesáu (Simón) y el que vive pa dir de monte (Berto). Asína qu'ensín más, partimos de Xixón sobre les 8 la mañana, y garramos autovía "Y" en direición Uviéu y siguimos dempués en direición Grau pola As-63, hasta la salida de Cangas del Narcea.

Equí tomaremos la As-15, pasando pelos pueblos de Salas de Bárzana, Santiagu la Barca y Requeixu, pa entrar a la fín nel conceyu de Miranda, travesando los pueblos de Cutiellos, Pumarada, San Bartolomé, L'Hospital, Llaureiru y Llongoria onde empobinarémonos pola As-227, travesando Samartín de Llodón, San Cristóbal, Fontouria, Silviella, Courias y a la fin, Balmonte onde desayunaremos perbien nun hotelucu.


Nel pueblín de Valbona en Miranda (701 ms)

Dempués d'esi prestosu almuerzu (cachu bizcochu que me zampé col café), tuviemos que tornar so los nuesos pasos, pa garrar un cruce a la nuesa manzorga (al altor de Courias), tomando la As-310, que nos llevará hasta l'Altu Las Estacas, dempués de pasar pol pueblu de Carricéu. Nesti altu, tomaremos el desvíu que baxa al pueblu de Las Estacas, pa dempués xubir hasta'l nuesu puntu d'aniciu, Valbona (701 ms).


Primeros pasos pola pista dexando atrás Valbona y alantre la Manteiga

Dempués d'entrugar a la xente'l pueblu onde dexábemos el coche pa nun molestar, ya que'l llugar nun tien munchu espaciu, preparámonos y a les 10 de la mañana tábemos andando, ganando-y altor al pueblu, que poquín a pocu veíamoslo embaxo nuesa.

Dicir que, cuantayá que nun teníemos una ruta d'esta miente, ensín track que nos marcáse'l camín, sacante de lo preparáu penriba'l mapa. Menos mal, que Simón ye'l perfeutu compañeru pa estes xeres, ya que nun suel protestar demasiáu nes entamaes nas que métome davezu, y aparte, l'inminente aportar al mundiu d'Olayina, fai-y esfrutar cada ruta un pocu más si cabe.

Estos primeros pasos, llevaránmos per pista siempre n'ascensión polos barrios de La Cruz, La Texera y Trailesia hasta que dexaremos la fonte'l Bustil.lín embaxu, y fadremos una primer xubida per onde meyor veamos, hasta'l l.lanu La Palanca, a unos 1100 ms, nos que se tien una bona visión del impresionante conceyu de Somiedu.


Nel l.lanu la Palanca a puntu de metenos a pola cresta

Magar d'echar un traguín pa moyar el gargüelu, ya que yeren 400 ms de desnivel fusilaos, tocaba metése nun terrén más difícil. Y ye que pol momentu foi too pista fácil, pero darréu vamos xubir hacia la xerra Manteiga, faciendo pasu ente'l Picu Bustil.lín y les primeres crestes de la Manteiga, pa bordiales pol mediu del Monte'l Pozu.

Como pue vese nes semeyes, ye ún de les partes más abegoses de la ruta, ya que vamos que tener que lluchar col berezu, d'un tamañu considerable, a la gueta de la senda que nos faiga avanzar lo más rápidu posible hacia dalgún pedreru, que lloñe de danos facilidaes nel andar taba nun estáu resbariosu, faciéndonos tar mui sollertes en cada pasu que dábemos.


Enmediu'l fregáu del monte'l Pozu

La verdá, ye que nun pueu dar indicaciones nidies, de si yera meyor metese tol tiempu nos pedreros o pelos matos, el casu ye, guetar el camín que meyor afaye a caún y dempués d'una vaguadina, ya xubiremos hacia la cresta'l Monte'l Pozu, con un andar más fácil, cola beriza y cotolla más pequeña y poro más acesible.

Nel intre d'empericotanos na cresta, el tiempu que taba decente (ñubes y claros), tornóse a pior, y una ñebla envolviónos dándo un sentir fríu y húmedu a l'ambiente. Nestes condiciones meteorolóxiques damos cota másima, a lo que sería'l Monte'l Pozu, y crestiamos con curiáu ya que la piedra tien mugor y patina, hasta aportar a los 1471 ms del Altu'l Pozu.


No altu'l Pozu (1471 ms) y na l.lana Porneda

Son dos hores y media esáutes, dende que partiéramos de Valbona, y más de 700 ms de desnivel direutu, asína que podemos tar satisfechos col trabayu fechu, ya qu'a partir d'agora con mayor o menor esfuerzu, tócanos tan solu caltener l'altor al travesu de tol crestéu hasta'l nuesu oxetivu, el Picu L'Urru.

Pero inda quedábanos muncho y si'l tiempu taba malu, entamó a ponése pior, con dalgo lluvia tornándose ñeve por momentos, a lo que sumámos-y qu'a tramos teníemos que lluchar contra unos bonos centímetros de ñeve nun estáu blandu, que facíen complicáu avanzar, y más tando convaleciente d'una lesión.


Metíos na ñeve col Altu'l Pozu detrás

Aún así, yera un día pa tar feliz, tenía ganes de monte, y taba esfrutando abriendo buelga, crestiando con tranquilidá, escoyendo'l camín a siguir con Simón, ensín mirar pal gps y falando de mil hestories,... ensín esmolecese nin siquiera pol mal tiempu, qu'a ratos abría y a otros zarrábase enforma.

Siguimos avanzando demientres les ñubes nos amosaben como los fotogrames d'una película tol campu de Tineú, hasta que retiráronse dafechu, y pudimos acolumbrar inda llonxana la caseta qu'encuma la pena Manteiga.


H.odíos col altor de la ñeve pero contentos

Diba ser ún hora y media dende qu'entamaramos el descensu del Altu'l Pozu hacia la L.lana Porneda, que fai de col.láu, col cresteríu más averáu al nuesu destín formáu polos picos de Pena Furada y la Val.linona, hasta que ganamos-y la batalla al Picu L'Urru y los sos 1520 ms d'altor.


A la fin, abrió'l día y quedó guapísimu

Tábemos encumaos al fin, casi a les 2 de la tarde, poro casi cuatru hores ensín parar costónos facenos col premiu de xintar el bocata na mayor cota del conceyu de Miranda. Así que, sacamos les semeyes de rigor col permisu del vientu y sentámonos tapecíos d'ésti pola cabañuca meteorolóxica, pal menos tener un segundu de relaxación.


Lluchando col vientu pa sacar la semeya nel Picu L'Urru (1520 ms)

Magar de los 20 minutos que tuviemos descansando, ponémonos en marcha de nueu pa facer una baxada, qu'a costafecha diba ser pelín aventurera, ya que sol mapa, tracé dellos caleyos a siguir, llevándonos al traviés de distintes brañes hasta tornar a Valbona, pero.... como siempre, la rialidá supera cualesquier intentu de previsión.

Nel nuesu casu, envede baxar hacia'l sureste, ganando'l col.lau la Espina y a posteriori pasar pola Braña la L.lalga y l'Altu Cigüedres hasta travesar las Val.linas de los Bueyes y l'Acebón, baxamos un pelín noreste, pa metenos una l.lamuerga ñevada, pela que perdimos bon tiempu hasta qu'alcanzamos las Val.linas anteriores, y pente mediu d'ellas algamamos la "llínea marcada", que diz la canción. (track verde: nuesa ruta, track rosa: ruta más afayaiza)


Cresta de la Manteiga y Somiedu dende'l Mirial

De lo malu, tuviemos na baxada una bona vista del casi total de la Pena Manteiga, y de la l.laguna del Mirial, colos picos de Somiedu al fondu, sumándo-y l'alcuentru con un enorme raposu pocu enantes d'atopar el camín correutu. A vegaes los erros faénmos sufrir, pero tamién, faente dar de focicu con delles visiones inesperaes, que solo la casualidá pue ufrinos.

Otra hora y cuartu dempués, ya dábemos bon pasu pel senderu, que nos diba dexar nel prau Porneda, onde echaríemos casi l'últimu vistazu hacia tola baxada que llevábemos fecha y tol crestéu que tanto nos fizo sudar. A partir d'equí daríemos bonos pasos acompangaos por dos mastines de lo más cansinos (nel so lladrar) que nos dexaríen (al fín) na braña de Valbona (956 ms).



Prau Porneda y braña Valbona

Y agora vieno otru momentu de tomar bones decisiones.... y como non, nel marabayu de caleyos qu'hai, fui a escoyer una vegada más el pior de toos, así que voi intentar allumar al qu'atrévase a facer esta ruta dende Valbona d'un xeitu asemeyáu al nuesu.

Na braña de Valbona, parte un camín en descensu (track rosa) que retrocede un pocu y va dar a otru camín que dirá paralelu al ríu Valbona y que pasando al llau de delles cabañes confluirá nel crucie col regueru Bustil.lín.

Como ta esti camín de baxada?, pues nun lo se, lo que si sabemos ye que si sigues de frente na braña Valbona aportarás a la Braña Las Veigas, onde podrás xubir hacia la fonte'l Bustil.lín, con salida a la pista que garráremos munches hores enantes. O tamién, podrás siguir adelantre hasta aportar a una cabaña, onde sigue un camín a la manzorga hacia'l regueru Bustil.lín que córtase al final o un camín a la mandrecha, que ta tupíu dafechu d'artos y pel que baxa más augua que'l propiu regueru, jeje.

Ehí ta, esi foi'l nuesu camín escoyíu, y que dexónos nel otru paralelu al ríu Valbona, que ya sele amosonos al fín, el pueblu de Valbona, esta vegada entrando pol barriu de Pascuneiru, ente los lladríos de los perros, que paez ser que tienen bona afición a ello, nesti pueblu.

Como siempre, en resume, podemos dicir que ruta afayaiza de facer en... dómina seca del añu. De xuru que, si gárrase la xerra Manteiga pela roca d'entamu al final, pues ser rápida de facer y mui prestosa de trepar y destrepar, pa llueu facer baxada col camín bien decidíu pasando por delles brañes guapes de ver. Al final, a nós llevónos un total de 7 hores y 20 minutinos nos que ficimos 15 kms y sufrimos un desnivel acumuláu de 1010 ms.


Camudando'l Camín dende'l Picu L'Urru (1520 ms)

Nesta ruta ficimos un vértice xeodésicu y cota más alta y "prestosa" de Miranda: Picu L'Urru (1530 ms) y la so segunda cota: Altu'l Pozu de 1471 ms

Ver progresos en: Retos montañeros