viernes, 27 de agosto de 2010

Pandecarme (Cangues d'Onís) - Refuxu de Vegarrionda

27 d'Agostu de 2010

Track: Pandecarme (Cangues d'Onís) - Refuxu de Vegarrionda



Esta entrada tien el so xacíu en dexar marcáu l'acesu a ún de los llugares d'entamu de ruta más clásicos n'Asturies y sobretou nel macizu del Cornión de Picos: el refuxu de Vegarrionda. Y ye que ya son unes cuantes les vegaes que partimos d'él pa facer dalguna ascensión a los munchos ya increibles picos d'esti macizu.

Si fuera solu a facese la ruta hasta'l refuxu ensín xeres complementaries, el mio conseyu ye facela dende'l Colláu Les Veleres, al llau del Llagu Enol. Con ello, dexaríemos el coche nesi llugar (onde meyor se pudiere ya que nun hai muncho aparcamientu), y caleyaríemos pegaos al llagu, colo que tien de guapu, pa lo postreru dir pasando al travíes d'una pista poles vegues d'Enol y La Cueva, qu'en díes espeyaos allúmanmos con unes vistes ablucantes, del tol macizu, hasta arribar a Pandecarme.


Vistes dende la Vega Enol

Dotramiente deberíemos, dempués de llegar a los Llagos de Cuadonga, siguir pela pista del colláu Les Veleres, hasta'l so fin, onde tenemos el parking de Pandecarme. Nun ye cuestión de ser puristes o non, pero al igual que mos pasa cola ruta a Vega Urriellu, nun ye lo mesmu dir a pasar el día, con una mochilina que xubir carga pa varios díes. Poro, si vamos facer una ascensión llarga, varios díes o necesitamos ferramientes (col pesu que conlleva) ye bona idega llibrase de camín de más, hasta Pandecarme, nesti casu del Cornión o hasta Pandebano, nel casu de la Vega Urriellu.


Partiendo de Pandecarme en distintes rutes
Asína pues, del parking de Pandecarme (nome que vien de ser un sitiu cóncavu, pando n'asturianu, asína que de panaderíes na, jeje), podemos entamar a xubir desnivel hacia'l refuxu de Vegarrionda, dempués de dexar el nuesu vehículu bien aparcáu.


Cruciando'l riu Pomperi a l'altura del Pozu L'Alemán

A partir d'equí abandónase la pista forestal pa dir ganando altor poquín a pocu pasando pol Pozu L'Alemán, nomáu así, porque'l conocíu como Alemán de Corao venía a bañase a esti pozu na riega de Ridimuña que llueu xúnese al riu Pomperi.


Na Vega La Piedra

D'equí pasaremos por dos guapes vegues como son la del Güertu y la vega la Piedra (1139 m) y pocu más arriba llegaremos a la Vega'l Texu onde entama la canal de Canrasu que sera'l primer mayor esfuerzu que nos dexará nes cabañes de la Rondiella (1378 m) onde les vistes de Peñasanta d'Enol son increibles.


De la rondiella vistes hacia'l Cornión

Dempués de tar un ratín acolumbrando delles cimes del Cornión, siguimos xubiendo hacia'l colláu Gamonal, onde a la fín, veremos el refuxu de Vegarrionda. Esta semeya del refuxu, fai siempre llevantar l'ánimu, porque lo que suel ser siempre un puntu nel camín, vese mui cerquina, pa siguir con más fuercia a cualquier ruta que nos propongamos.


Colláu la Gamonal (1445 ms) y el Refuxu Vegarrionda al fondu

Nel refuxu, tendremos fonte onde cargar d'augua, y dellos servicios en casu de que pernoctemos, como baños, ducha, bar,... Aparte d'ello la situación del refuxu (1460 ms), sírvenos pa facer una gran parte de les grandes ascensiones del Cornión, como les Peñes Santes, con un acesu non demasiáu llargu, y por tanto, pesáu.


Refuxu de Vegarrionda

lunes, 23 de agosto de 2010

Pandecarme (Cangues d'Onís) - Picu Requexón

25 de Xunetu de 2010

Track: Pandecarme (Cangues d'Onís) - Picu Requexón



Dos selmanes pasaron tan solo dende la travesera y ya dalgunos teníemos bien de ganes de tornar a la montaña. Menos mal, qu'esti picor diba pasáse gracies a los nuesos collacios vascos, que diben facer dalgo per picos, y nesti casu diba ser nel Cornión.

Como non, dempués d'almorzar daqué en Cangues d'Onís, partimos en direición los Llagos de Cuadonga, pal llegar al colláu Les Veleres, garrar pista hasta l'aparcamientu de Pandecarme, onde ya entama a ser clásicu como puntu partida, como nestes rutes: Mirador d'Ordiales - Picu Cotalba o Pandecarme (Cangues d'Onís) - Asturianos - Canal Parda - Traviesos - H.orcada Miguel - Mesones - Caín (Llión).


Saliendo de Pandecarme (Cangues d'Onís)

De Pandecarme (1071 ms) como ye vezu, vamos empobinanos al refuxu de Vegarrionda, pola so ruta normal (la cual dexaré marcada pa siempre, nuna entrada, ya qu'al igual que la Vega Urriellu ye un entamu de rutes mui clásicu). Asína que facemos el míticu camín al traviés del pozu l'Alemán pa pasar poles vegues del Güertu, la Piedra y el Texu, enantes de metenos na canal de Canrasu, que nun xubir fácil, pónenos na vega Rondiella.


Xubiendo a Vegarrionda y acolumbrando dellos picos

Depués d'acolumbrar un ratín los cumales (de drecha a esquierda) de picos tan guapos como Cotalba, Torre de la Canal Vaquera, Poyones y sobretóu l'oxetivu, Requexón, facemos un pelín d'esfuerzu más p'ascender hasta'l colláu Gamonal (1445 ms), onde ya tendremos a vista'l refuxu de Vegarrionda (1460 ms).


Refuxu de Vegarrionda

Esti camín tenemoslo bien fechu ya, y llegamos aína (1h:15 min) al propiu refuxu, lo cual camiento que nun foi lo más adecuáu pal nuesu collaciu Pangua, que mareóse na xubida a los llagos y tol caleyar de Pandecarme hasta Vegarrionda, diba más blancu qu'un pantasma. Na, que nun s'igüe con una bona arroxada, jeje. D'ehí recuperó les fuercies y ya tuvo tol día col so caleyar gayoleru.


El Porru Bolu, presente durante muncha parte la ruta

Magar que garramos agua na fonte'l refuxu, siguimos ruta pol senderu que lleva'l H.ou Santu, y a l'altura de la Llampa Cimera, envede torcer hacia la manzorga pa xubir al colláu La Fragua, pasamos per debaxu del Porru Bolu, peñón de forma preciosa, que llama a la gueta d'una vía per onde xubilo n'otra ocasión.


Porru o Cuetu Llagu detrás nuesa

Un de les partes más prestoses d'esta ruta ye dir arrodiando'l Porru Bolu enriba nuesa, nunos pasos ente peñes, nos que vamos viendo'l Porru Llagu embaxo, y Porru Bolu y Mayada enriba, hasta facer una ascensión fácil en ciszás hacia'l Mosquil de Cebolleda (2100 ms) .


Del Mosquil de Cebolleda al colláu les Merines

Dende equí tenemos unes vistes increibles del grupu Cebolleda-Peñasanta, y les Torres de la H.orcada, Enmediu y la Torrezuela. Pero, sinceramente, equivocámonos un pelín y nun había que xubir hasta equí ya qu'anque les vistes con ablucantes, darréu va tocanos baxar altor, hacia'l Colláu Les Merines, al cual arríbase desviándose a la mandrecha enantes de los nomaos ciszás anteriores.


Los tres poyones y servidor faciendo'l cuartu, jeje

Magar del colláu Les Merines (2070 ms), con 3 hores y media de ruta, ya tenemos enfrente nuesa l'arista que mos va servir de vía de xubida al Requexón. De primeres, a vista, paez más complicáu de lo que ye na rialidá, asína que sin mieu tírase p'alante hacia la chimenea pola que vamos xubir. Namás tenemos un pasín llateral de travesía dalgo aéreo, pero con bones manes y pies en delles grietes, y ya taremos na propia chimenea.


Travesía llateral y chimenea nel Requexón

La cual fadráse ensín dificultá, sortiando delles peñes hasta algamar el cumal del Requexón a 2169 ms. Poco más hai que cuntar d'esti ascensu, que sirve pa tar nel Requexón, mirador espeutacular de les mayores cotes de Cangues d'Onís y Amieva, y al que tan solo tardamos en trepar 20 minutinos, dende'l colláu.


Vistes dende la cume del Requexón

Poro, rondando les 4 hores tamos n'otra cume más del cada día más queríu pa mi Cornión. Ya se que los Urrieles son más agrestes y altos, pero la belleza de les vegues del Cornión, quiciás da sensación de tener más vida esti macizu, sobretou nesti añu con tanto verde.


Semeya de grupu nel cumal del Requexón (2169 ms)

Namái quédanos ya baxar d'esti picu, llende ente los conceyos de Cangues d'Onís y Amieva, y xintar con non demasiada tranquilidá nel colláu, ya qu'esti domingu nel que ficimos la ruta, yera la folixa'l Pastor na vega Enol, y l'alloriada de coches que xuben y baxen taben controlaos dafechu, poro la ruta nun podía estendese más, sinon queríemos esperar hasta les 8 pa baxar.


Baxando del Requexón

La baxada faise pol mesmu sitiu, andando con güeyu nos pasinos que tovimos pa xubir, y ensin más, xintamos con Bea, que decidióse a non xubir, y pusímonos en marcha pa llegar a Pandecarme lo antes posible, ya qu'a les 5 pesllábanmos la posibilidá de baxar a Cangues d'Onís.


Semeyes durante la baxada

En resumen, ruta prestosa, mui recomendable y diba decir que non mui llarga (7 hores, jeje), pero cuntando que son 17 kms y 1270 ms de desnivel acumuláu, nun se pue dicir que seya facilona. Ye lo que pasa cuando vienes de pegarte sobas de más de 10 hores en díes siguíos cola travesera, que too paezte más cenciello.

La prósima munchu más y meyor....


Camudando'l Camín nel Requexón

Nesta ruta ficimos 1 dosmil de Cangues d'Onís y Amieva: Picu Requexón (2169 ms)
Ver progresos en: Retos montañeros

jueves, 19 de agosto de 2010

Travesera Picos 2009 - 2010

Del 8 al 11 de Xunetu de 2010

Track: Travesera Picos 2009 -2010

 
Primer travesera integral de Picos del GM Xuan de la Borrina, y al mio entender nun va ser la cabera nin muncho menos, a pesar de les munches incógnites que teníemos na tiesta, cuando tábemos preparándola. Nun sabíemos si seríemos a finalizala, nin cuantos díbemos finalizala, solo sé, que dempués de llevala a cabo, toos sabemos que sin Mariano, el nuesu coche escoba, nun podría ser posible. 
 
Dende equí mil gracies, por facenos un favor tan grande nos díes que nos acompangó. Tamién les gracies a tolos que la intentaron y que de xuru tan dispuestos l'añu que vien, a facer la siguiente llocura que se nos ocurra, porque prometemos que será como mínimu tan guapa, emocionante y dura como la d'esti añu. 
 
 
Tolos participantes de la Travesera 2009 - 2010
 
Gracies collacios: Mariano, Bittor, Jóse, César, Simón, Pangua, Toni, Raul y Canta A Fernan, poques gracies tengo que da-y porque ye tan culpable como yo, d'esta alloriada de travesera, así que pa la prósima preparámosla meyor inda. Besarkada bat collaciu
 
Vamos dexar unos datos a modo resumen y les correspondientes entraes del blog:  
 
Estaya 1: 
 
Duración: 10 h 
Llonxitú: 17 km
Ascensu: 1915 m
Descensu: 2515 m
 
Estaya 2: 
 
Duración: 10 h 
Llonxitú: 14 km
Ascensu: 2450 m
Descensu: 940 m
 
Estaya 3: 
 
Duración: 7 h 
Llonxitú: 8 km
Ascensu: 580 m
Descensu: 1440 m
 
Estaya 4: 
 
Duración: 6 h 
Llonxitú: 14 km
Ascensu: 1570 m
Descensu: 1590 m
 
Totales  
Duración: 33 h 
Llonxitú: 53 km
Ascensu: 6515 m
Descensu: 6485 m
 
Namái queda dicir, ta la prósima....